Meydka Danjirihii Somalia ee South Africa oo maanta la keenaayo Magalada Muqdisho.
Allaha u naxariistee waxaa lagu wadaa in barqanimada maanta Magaalada Muqdisho lagu aaso Safiirkii Somaliya u fadhiyay dalka South Africa Sayid Xasan Shariif Cabdullaahi, oo Arbacadii geeriyooday.
Garoonka Diyaaradaha Aadan Cadde ee Magaalada Muqdisho, ayaa waxaa ka soconeysa qaban qaabo loogu diyaar garoobaayo, sidii looga soo dejin lahaa meydka Safiirkii geeriyooday.
Danjiraha geeriyooday ayaa waxaa lagu wadaa in maanta Aas Qaran loogu sameeyo Magaalada Muqdisho, waxaana sidoo kale Salaadda Janaasadiisa ka qeybgeli doona Madaxda Dowladda.
Wasiirka Wasaarada Warfaafinta, Boostada & Isgaarsiinta C/laahi Ciilmooge Xersi, oo Saxaafada kula hadlay Magaalada Muqdisho, ayaa wuxuu cadeeyay in Aas Qaran Jimcaha maanta ah Magaalada Muqdisho loogu sameyn doono Danjire Sayid Xasan Shariif Cabdullaahi.
Wasiirka ayaa wuxuu tilmaamay in meydka Danjiraha laga soo qaadi doono Magaalada Pretoria, waxaana la soo marsiin doonaa buu yiri Magaalada Nairobi, iyadoo 9:30pm laga soo dejin doono sida uu yiri Garoonka Magaalada Muqdisho.
Ciilmooge ayaa sheegay in meydka Safiirka ay la socdaan qaar ka tirsan caruurtiisa iyo weliba xubno ka tirsan Shaqaalaha Safaarada Somalida ee South Africa.
Geerida naxdinta leh ee ku timid marxuum Sayid Xasan Shariif Cabdullaahi, ayaa waxay ka dhigan tahay Safiirkii ugu horeeyay oo Somaliyeed oo geeriyooda, tan iyo markii uu Madaxtinimada dalka uu la wareegay Prof. Xasan Sheekh Maxamuud.