നമ്മളിൽ നിന്ന് ഭൗതികമായി വിട്ടുപിരിഞ്ഞ് തൻറെ നിത്യ ഭവനമായ സ്വർഗ്ഗത്തിലേക്ക് യാത്രയായിരിക്കുന്ന. ഏറ്റവും പ്രിയപ്പെട്ട റവ:ഡോ. ബിജി മാർക്കോസ് ചിറത്തിലാട്ടച്ചന്റെ ദേഹവിയോഗത്തിൽ അഗാധമായ ദുഃഖവും അനുശോചനവും രേഖപ്പെടുത്തുകയും. ബിജിയച്ചന്റെ വേർപാടിന്റെ വേദനയിലും ദുഃഖത്തിലും ആയിരിക്കുന്ന ബിന്ദു അമ്മായിയേയും മക്കളെയും  അച്ഛൻറെ  കുടുംബാംഗങ്ങളെയും സർവ്വശക്തനായ ദൈവം ആശ്വസിപ്പിക്കുകയും ബലപ്പെടുത്തുകയും ചെയ്യട്ടെയെന്ന് പ്രാർത്ഥിക്കുകയും ചെയ്യുന്നു

          പ്രിയപ്പെട്ട ബിജിയച്ചനുമായി 1997 മുതലുള്ള അടുപ്പവും ബന്ധവുമാണ് എനിക്കുള്ളത്. 97ൽ വിയന്ന സെന്റ്മേരിസ് പള്ളിയിൽ സ്ഥിരമായ വി: കുർബാനയ്ക്കുള്ളസംവിധാനമില്ലാതിരുന്നപ്പോഴാണ്  ബിജിയച്ചൻ വിയന്നായിലേക്ക് കടന്നു വന്നത്. പിന്നീട് മാസത്തിൽ  ഒരു കുർബാന എങ്കിലും അർപ്പിക്കാൻ കഴിഞ്ഞത് ബിജിയച്ചൻ ഈ ഇടവകയുടെ വികാരിയായി  ചുമതലയേറ്റതിനുശേഷമാണ്. പിന്നീട് നിരവധി കാലം അച്ഛനോടൊപ്പം വിയന്ന സെൻറ് മേരീസ് ഇടവകക്ക് വേണ്ടി ശുശ്രൂഷിക്കാൻ കഴിഞ്ഞത് നന്ദിയോടെ ഓർക്കുകയാണ്. 2000ൽ ആണ് അച്ഛൻറെ കുടുംബം  സ്ഥിരമായി വിയന്നായിലേക്കെത്തുന്നത്. അന്ന് ജർമ്മനിയിലെ മാർബുർഗിലായിരുന്ന അച്ഛൻറെ സാധനസാമഗ്രികൾ കൊണ്ടുവരാനായി മാർബുർഗിലേക്ക് അച്ചനുമൊ ത്തുള്ള യാത്ര ഇന്നും മനസ്സിൽ മായാതെ പച്ചപിടിച്ചു നിൽക്കുന്നു ആ യാത്രയിലാണ് അച്ചൻ മനസ്സുതുറന്ന് കുറെ സംസാരിച്ചത്. അന്ന് അച്ചൻ സ്നേഹത്തോടെ എനിക്ക് രണ്ട് ഉപദേശം തന്നത് ഇന്നും ഞാൻ ഹൃദയത്തിൽ സൂക്ഷിക്കുന്നു അന്നച്ചൻ എന്നോട് പറഞ്ഞു ഇന്നിത് ജോളിക്ക് മനസ്സിലാകില്ല. എന്നാൽ പിന്നീട് മനസ്സിലാക്കുമെന്ന്  പിന്നീടെ ൻറെ ജീവിതത്തിൽ  ഞാനാ സത്യങ്ങൾ തിരിച്ചറിഞ്ഞപ്പോൾ അച്ചൻറെ ദീർഘവീക്ഷണത്തെ ഞാൻ മനസ്സിലാക്കി.

                       2000 തുടങ്ങി വിയന്ന സെൻ മേരീസ് പള്ളി പ്രിയപ്പെട്ട ബിജിയച്ചൻറെ ആത്മീയ ശിക്ഷണത്തിൽ പടിപടിയായി  ഉയരുവാൻ തുടങ്ങി. മാസത്തിൽ ഒരു പ്രാവശ്യം വിശുദ്ധ കുർബാനയു ണ്ടായിരുന്ന പള്ളി പിന്നീട് 2 ഞായറാഴ്ചയായും 4 ഞായറാഴ്ചയായും ഉയർന്നത് അച്ചന്റെ ശ്രമഫലമായിട്ടായിരുന്നു. പിന്നീട് സൺഡേ സ്കൂൾ മൊർത്തമറിയം വനിതാ സമാജം,യുത്ത് അസോസിയേഷൻ, മുതലായ ഭക്തസംഘടനകൾ ആരംഭിച്ചതും ബിജിയച്ചന്റെ കാലത്തായിരുന്നു. വിയന്നായിലുള്ള വിവിധ സ്കൂളുകളിൽ റിലീജിയോൺ പഠിപ്പിച്ചതും ബിജിയച്ചനായിരുന്നു. അച്ചൻ വിയന്നയിൽ നിന്നും UK യിലേക്ക് പോയതിനു ശേഷം ഇന്നും റിലിജിയോൺ പഠിപ്പിക്കാൻ വേറെയാരുമില്ലയെന്നത് അച്ചന്റെ പ്രാധാന്യത്തെ ഓർമ്മപ്പെടുത്തുന്നു. വിയന്നയിൽ ആദ്യമായി കാത്തലിക് കമ്മ്യൂണിറ്റിയുടെ നേതൃത്വത്തിൽ ക്രിസ്മസ് കരോൾ ഗാന മത്സരമാരംഭിച്ചപ്പോൾ വിയന്ന സെൻറ് മേരീസ് ഇടവക പന്കെടുത്തത് ബഹുമാനപ്പെട്ട ബിജിയച്ചന്റെ നേതൃത്വത്തിലായിരുന്നു. വിയന്നായിലുള്ള ഇതര ക്രൈസ്തവ മതവിഭാഗങ്ങളുമായി നല്ല ബന്ധം പുലർത്തിയിരുന്നപ്പോഴും അടിയുറച്ച അന്ത്യോഖ്യാ വിശ്വാസിയായിരുന്നു ബിജിയച്ചൻ. വിയന്ന സമൂഹത്തിൽ കുഞ്ഞുങ്ങളുടെ ഏറ്റവും പ്രിയപ്പെട്ടവനായിരുന്നു ബിജിയച്ചൻ. വിയന്നയിൽ നിരവധി കുട്ടികൾക്ക് അറിവിന്റെ  ആദ്യാക്ഷരം കുറിപ്പിച്ചതും ബിജിയച്ചനായിരുന്നു.

                                    അച്ചൻ മികച്ചൊരു അദ്ധ്യാപകൻ കൂടിയായിരുന്നു.  അച്ചന്റെ എല്ലാ അവധിക്കാലങ്ങളിലും. വെട്ടിക്കൽ വൈദിക സെമിനാരിയിൽ ക്ലാസെടുക്കു മായിരുന്നു അച്ഛൻ. മികച്ചൊരു സംഘാടകൻ. കൂടിയായിരുന്നു പ്രിയപ്പെട്ട അച്ഛൻ. MSOC യൂറോപ്പ് കൗൺസിലിന്റെ പ്രഥമ കുടുംബ സംഗമം വിയന്നയിൽ വെച്ച് നടന്നപ്പോൾ അച്ഛനായിരുന്നു അതിന്റെ രക്ഷാധികാരി. അന്നച്ചനോടൊപ്പം പ്രവർത്തിച്ചത്  നന്ദിയോടെ സ്മരിക്കുന്നു. ആ കുടുംബ സംഗമത്തിന്റെ വിജയം അച്ചന്റെ സംഘാടക മികവിനെക്കാണിക്കുന്നു.. അച്ചന്റെ നേതൃത്വത്തിൽ എല്ലാ വർഷവും ടൂറുകൾ സംഘടിപ്പിച്ചിരുന്നു. ഇടവകാംഗങ്ങളുടെ കൂട്ടായ്മക്കും ഇടവകയുടെ പുരോഗതിക്കും ഇതേറെ സഹായകരമായിരുന്നു. ഗ്രില്ലും സ്പോർട്സും തുടങ്ങിയതും  ഇടവകാംഗങ്ങളുടെ ഭവനങ്ങളിൽ  പ്രാർത്ഥന കൂട്ടായ്മ ആരംഭിച്ചതും അച്ചന്റെ കാലത്താണ്. വിയന്ന സെൻറ് മേരീസ് ഇടവകയുടെ ഇന്നത്തെ വളർച്ചയിൽ നിസ്തുലമായ സംഭാവനകളാണ് പ്രിയപ്പെട്ട ബിജിയച്ചന്റേത്. അച്ചൻ ഒരു തികഞ്ഞ മനുഷ്യ സ്നേഹി യായിരുന്നു.  അച്ചന്റെ മരണ വാർത്തയറിഞ്ഞ് ഇറ്റലിയിലെ ട്രവീസോ എന്ന സ്ഥലത്ത് നിന്ന് സുരേഷ് എന്ന് പറയുന്ന ഒരു സഹോദരൻ എന്നെ വിളിച്ചു പറഞ്ഞതിങ്ങനെയാണ്പ തിനായിരക്കണക്കിന്  ആളുകളുടെ മരണ വാർത്തയാണ് ദിവസവും ഞങ്ങൾ കേട്ടു കൊണ്ടിരിക്കുന്നത് നിർവികാരമായ ജീവിതമാണിപ്പോളിവിടുത്തേത്. എന്നാൽ ബിജിയച്ചന്റെ മരണ വാർത്തയറിഞ്ഞപ്പോൾ   ഞങ്ങൾ തകർന്നു പോയെന്ന്. ആസമുഹത്തിന് ചെയ്ത ശുശ്രൂഷകൾ ഞങ്ങൾ മറക്കില്ലെന്ന്.  അച്ഛന്  ഈ സമൂഹത്തിൽ ഉള്ള വില എന്തെന്ന് ആ വാക്കുകളിലൂടെ നമുക്ക് മനസ്സിലാക്കാം. അച്ചനിവിടെ നിന്നും ലണ്ടനിലേക്ക് പോയതിന് ശേഷവും ഇടവകാംഗങ്ങളുമായുള്ള ആത്മബന്ധം സൂക്ഷിച്ചിരുന്നു......

                എന്റെ വ്യക്തിപരമായ ജീവിതത്തിലും അച്ചനുമായുള്ള ബന്ധം മറക്കാനാവാത്തതാണ്. അച്ചന്റെ വാത്സല്യ സ്നേഹം അനുഭവിച്ചറിഞ്ഞ വ്യക്തിയാണ് ഞാൻ. ഒരിക്കൽ ജോലി സ്ഥലത്ത് വെച്ച് എന്റെ നടു മിന്നുകയും ആംബുലൻസിൽ എന്നെ വീട്ടിൽ കൊണ്ടുവന്നാക്കുകയും ചെയ്തു ശരീരമനക്കാൻ വയ്യാതെ സോഫയിൽ കിടന്ന എന്നെ കൂടെയിരുന്ന് ശുശ്രൂഷിച്ചത് പ്രിയപ്പെട്ട ബിജിയച്ചനായിരുന്നു. വിയന്ന സമൂഹത്തിൽ ആർക്ക്  വേദനകളുണ്ടായാലും  ബിജിയച്ചനവിടെ ഓടിയെത്തുമായിരുന്നു ഒരിക്കൽ വിയന്നയിലുള്ള സ്റ്റാലിൻ എന്ന സഹോദരൻറെ. മകൾ ഓപ്പറേഷനെ തുടർന്ന് മരണപ്പെട്ടപ്പോൾ അച്ചനെന്നെ വിളിച്ചു പറഞ്ഞു ജോളി നമുക്ക് അവിടം വരെ ഒന്ന് പോകണമെന്ന്.അച്ചനോടൊപ്പം ആ കുടുംബത്തിൽ പോവുകയും ആ കുഞ്ഞിനുവേണ്ടി ധൂപം വെച്ച് പ്രാർത്ഥിച്ച് ആ കുടുംബത്തിന് ആശ്വാസം പകർന്നതും അച്ചനിലെ മനുഷ്യസ്നേഹിയെ ചൂണ്ടിക്കാണിക്കുന്നു. ലിജോ മോന്റെ അസുഖം കൂടുമ്പോൾ എല്ലാവരെയും കൂട്ടി  അവന്വ് വേണ്ടി പള്ളിയിൽ പലവട്ടം പ്രാർത്ഥിച്ചതുമെല്ലാം ഇത്തരുണത്തിൽ സ്മരിക്കുകയാണ്. ......