TSHIMEGA YA MOGOPA
Ke bua ka Ratlhwatlhwa Ke bua ka mogaka
Tlharapa le leele theka la mofu
Tsibola-ntha ya ga Garatwe Mogatsa Sipho
Tshimega ya Mogopa oora Tladinyane
Mogatsa Mnamponiki theka tshesane
Mosimane wa seema ka nkoto kgatlha Badimo
A belegwa Tlhakole a gorogile
Ngwaga di le somamabedi
i pele re pusa
A bo a le mosetlha e kete lerotse
Moriri o le boditse ka nko e lenono
Bontle ba ngwana wa mo Afrika
A dirisa borethe jwa puo le leleme
A ipala mabala a kgaka manontlhotlho
A gapa Ya lesika Kgetleng Mnamponiki
Ga lla dinyeenyee lapa la gola
Ngwetsi ya bakwena a bo a dirile
Pigi ya tswa Kgetleng e le botlhoko
Ngwetsi ya Bakwena ya bo e
fulere
Tshimega ya tlhonama ra itlhoboga
Ra sala le dikwenanyana ra ikgomotsa
Ao! Tse di botlhoko ga di fele tlhe!
Selalome sa tsena mo lapeng ga senyega
Ditiro tsa mosadi wa mmolai
Ra utlwisiwa botlhoko ke motho re sa mo rera
Menwana ya rona rotlhe ra e tsenya nkong
Robala Mogopa o ikhutse go siame
Robala tshimega ya Bakwena o ikhutse
Nama maoto o robale
Mogoloa Josefa le Rapula dikwena tsa madiba
Kgaitsadia Nkoko-ntswaki-a basimane
Robala tsibola-ntha Tladinyane A-Mogopa
O re sietse dikwena re tla gagaba
Re tla nne re go gopola sebatsa sa nadiba